រាជធានីភ្នំពេញ៖ ព្រឹកថ្ងៃពុធ ៥រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៨ ខែកញ្ញា ឆ្នាំ២០១៩ នៅទីស្ដីការក្រសួងប្រៃសណីយ៍ និងទូរគមនាគមន៍ មានរៀបចំព្រឹត្តិការណ៍ប្រកួតប្រជែងផ្នែកសន្តិសុខបច្ចេកវិទ្យាគមនាគមន៍ និងព័ត៌មាន ២០១៩ (Cambodia Cyber Champion 2019) ក្រោមអធិបតីភាព លោក អ៊ូ ផាន់ណារិទ្ធ ប្រធាននាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មាន នៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន។ ព្រឹត្តិការណ៍នេះត្រូវបានរៀបចំឡើងដោយនាយកដ្ឋានសន្តិសុខបច្ចេកវិទ្យា គមនាគមន៍ និងព័ត៌មាន ក្រោមការគាំទ្រដោយក្រសួងប្រៃសណីយ៍ និងទូរគមនាគមន៍ ក្នុងគោលបណងដើម្បីជំរុញលើកកម្ពស់បញ្ជ្រាបការយល់ដឹង និងការអភិវឌ្ឍធនធានមនុស្សផ្នែកសន្តិសុខបច្ចេកវិទ្យាគមនាគមន៍ និងព័ត៌មាន ស្របទៅតាមគោលនយោបាយរបស់រាជរដ្ឋភិបាលក្នុងការរៀបចំខ្លួនសម្រាប់សេដ្ឋកិច្ចឌីជីថល និងឆ្លើយតបនឹងបដិវត្តន៍ឧស្សាហកម្មទី៤ ដោយមានការចូលរួមបេក្ខជនចំនួន ១៦នាក់ ស្មើនិង ៨ក្រុម (អវត្តមានមួយក្រុម) មកពីមហាវិទ្យាល័យនានា និងក្រុមហ៊ុនឯកជននៅរាជធានីភ្នំពេញ។
ជាកិច្ចចាប់ផ្តើមបើកកម្មវិធី លោក អ៊ូ ផាន់ណារិទ្ធ បានថ្លែងលើកឡើងអំពីសារៈសំខាន់នៃការកសាងសមត្ថភាពធនធានមនុស្សដែលមានជំនាញផ្នែកសន្តិសុខបច្ចេកវិទ្យាគមនាគមន៍ និងព័ត៌មាន។ សព្វថ្ងៃនេះជំនាញមួយនេះគឺមានតម្រូវការយ៉ាងខ្លាំង ទាំងក្នុងស្រុក និងនៅក្នុងតំបន់ ហើយលោកបានផ្តាំផ្ញើឱ្យបេក្ខជនដែលចូលរួមទាំងអស់ ទោះបីទទួលបានជ័យលាភី ឬមិនបានក្ដី ត្រូវខិតខំសិក្សារៀនសូត្រជំនាញមួយនេះបន្ថែមទៀត ដើម្បីឱ្យកម្ពុជាយើងមានធនធានបន្ថែមក្នុងការការពារ ទប់ស្កាត់ និងឆ្លើយតបទៅនឹងការវាយប្រហារនានាពី
អ៊ិនធឺណិត។
ការប្រកួតនេះគឺមានរយៈពេលពេញមួយថ្ងៃ ហើយក្រុមដែលទទួលបានជ័យលាភីចំនួនពីររូប នឹងត្រូវចាត់បញ្ជូនទៅចូលរួមប្រកួតបន្តនៅប្រទេសថៃនាខែវិច្ឆិការខាងមុខនេះ។
ការប្រកួតនេះគឺមានលក្ខណៈជាទម្រង់ Capture The Flag (CTF) ប្រភេទ Jeopardy Style ដែលមានប្រភេទសំណួរ (challenges) ដូចជា Digital Forensics, Network Analysis, Cryptography, Reverse (Binary) និង Miscellaneous ដែលបានចងក្រងឡើងឆ្លើយតបទៅបច្ចេកទេសក្នុងតាមការតានដាន និងកំណត់អត្តសញ្ញាណនៃការវាយប្រហារ និងការលួចទិន្នន័យនាពេលបច្ចុប្បន្ននេះ ដែលឆ្លុះបញ្ចាំងអំពីចំណេះដឹងដែលកំពុងមានតម្រូវការខ្ពស់ក្នុងផ្នែកសន្តិសុខបច្ចេកវិទ្យាគមនាគមន៍ និងព័ត៌មាននៅតាមស្ថាប័ននីមួយៗ។
ការប្រគល់ជ័យលាភី
ក្រោយពីការប្រកួតប្រជែងរយៈពេលពេញមួយថ្ងៃរួចមក ជ័យជំនៈត្រូវបានធ្លាក់ទៅលើក្រុម “KHroot” ដែលរួមមានសមាជិក ២រូបគឺ លោក អ៊ឹង ប៉ហៃ មកពីក្រុមហ៊ុន ផាយ ផេ (Pi Pay) និងលោក កាក់ យុត្ថាវុឌ្ឍ មកពីធនាគារឯកទេសខ្មែរ ភីអិលស៊ី (Khmer Specialize Bank Plc.) រកបានពិន្ទុប្រមាណជា ៣១០០ ក្នុងពន្ទុសរុបប្រហែល ៦០០០។ លោក អ៊ូ ផាន់ណារិទ្ធ ប្រធាននាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មាន បានប្រគល់រង្វាន់ដល់បេក្ខជនជ័យលាភី និងបានផ្តាំផ្ញើរឱ្យបេក្ខជនទាំងពីរប្រឹងប្រែងស្រាវជ្រាវបន្ថែមទៀតមុនពេលដែលខ្លួនចេញ ទៅប្រកួតថ្នាក់តំបន់នៅប្រទេសថៃនាពេលខាងមុខនេះ៕
