រាជធានីភ្នំពេញ : នៅថ្ងៃចន្ទ ៨កើត ខែស្រាពណ៍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៦ ខែសីហា ឆ្នាំ២០២១ នាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាន នៃក្រសួងប្រៃសណីយ៍និងទូរគមនាគមន៍ បានសហការជាមួយនឹងគម្រោង CYBER4Dev របស់សហគមន៍អឺរ៉ុប បានរៀបចំសិក្ខាសាលាបណ្តុះបណ្តាលស្តីអំពី “Advanced CSIRT Technical Training” ចាប់ពីថ្ងៃទី១៦ ដល់ ថ្ងៃទី១៩ ខែសីហា ឆ្នាំ២០២១ តាមរយៈអនឡាញ។ ដែលមានការចូលរួមពីសិក្ខាកាម មកពីក្រសួង-ស្ថាប័នរាជរដ្ឋាភិបាល ប្រមាណ ៧៥នាក់។
គោលបំណងរបស់សិក្ខាសាលានេះ គឺដើម្បីបង្កើន និងពង្រឹងសមត្ថភាពដល់មន្ត្រីបច្ចេកទេស ទៅលើការគ្រប់គ្រង វិភាគ និងឆ្លើយតបឧប្បត្តិហេតុសន្តិសុខសាយប័រ ពីការវាយប្រហារសាយប័រ តាមរយៈការបង្ហាត់បង្ហាញ និងការអនុវត្តផ្ទាល់ ដើម្បីអាចត្រៀមខ្លួនជាមុន និងពង្រឹងយន្តការនៃការគ្រប់គ្រងនិងឆ្លើយតបទៅនឹងឧប្បត្តិហេតុសន្តិសុខសាយប័រ។ សិក្ខាសាលាខាងលើនេះបានប្រព្រឹត្តទៅក្រោមបរិយាកាសរីករាយ ស្និទ្ធស្នាល ប្រកបដោយការទទួលខុសត្រូវខ្ពស់ ដោយមានការចែករំលែកចំណេះដឹង និងបទពិសោធន៍ ពីសំណាក់វាគ្មិន រួមទាំងការពិភាក្សា សំណួរ និងចម្លើយ ទៅលើបញ្ហាផ្សេងៗដែលសិក្ខាកាមបានជួបប្រទះ នាពេលបច្ចុប្បន្ន។
