១.ព័ត៌មានទូទៅ
ឧបករណ៍ USB flash drive ត្រូវបានគេប្រើយ៉ាងទូលំទូលាយសម្រាប់ការផ្ទុកទិន្នន័យ និងយកតាមខ្លួន ប៉ុន្តែ USB flash drive ក៏អាចត្រូវបានគេប្រើប្រាស់ដើម្បីលួចព័ត៌មានផ្ទាល់ខ្លួនឬផ្នែកហិរញ្ញវត្ថុ។ អត្ថបទនេះពន្យល់ពីការវាយប្រហារតាម USB និងផ្តល់ការណែនាំអំពីរបៀបការពារ។
២.តើការវាយប្រហារតាម USB គឺជាអ្វី?
ការវាយប្រហារតាម USB មិនមែនចេញពី USB flash drive តែមួយមុខប៉ុណ្ណោះទេ ប៉ុន្តែអាចបណ្តាលមកពីឧបករណ៍ណាមួយដែលភ្ជាប់តាមរយៈរន្ធ USB ផងដែរ។ ចោរព័ត៌មានវិទ្យា ឬហេកគ័រ អាចធ្វើការបញ្ចូលមេរោគ ឬកម្មវិធីព្យាបាទទៅក្នុង USB ឬរន្ធ USB។ នៅពេលអ្នកភ្ជាប់ USB ដែលឆ្លងមេរោគទៅកាន់ឧបករណ៍អ្នកនឹងឆ្លងមេរោគ ឬ malware។ បន្ទាប់មកចោរព័ត៌មានវិទ្យា ឬហេកគ័រ អាចលួចព័ត៌មានសម្ងាត់ពីឧបករណ៍របស់អ្នកបាន។
៣.ប្រភេទនៃការវាយប្រហារ
ស្វែងយល់អំពីប្រភេទការវាយប្រហារទូទៅតាម USB និងដើម្បីទប់ស្កាត់ប្រកបដោយប្រសិទ្ធភាព៖
- ការវាយប្រហារតាម microcontroller USB៖ ចោរព័ត៌មានវិទ្យា ឬហេកគ័រ អាចធ្វើការបញ្ចូលមេរោគ ឬកម្មវិធីព្យាបាទទៅក្នុងឧបករណ៍ USB នៅពេលដែលភ្ជាប់ឧបករណ៍ USB វានឹងលួចទិន្នន័យរបស់អ្នកដោយស្វ័យប្រវត្តិ
- ការវាយប្រហារតាម USB ដែលបានកែប្រែ៖ USB ត្រូវបានកែប្រែឡើងវិញស្រដៀងនឹង USB ធម្មតាប៉ុន្តែការប្រើប្រាស់គឺមិនមានសុវត្ថិភាពទេ វាអាចដំណើរការកម្មវិធីព្យាបាទនៅលើឧបករណ៍ ដោយស្វ័យប្រវត្តិ និងអាចធ្វើការរំលងពាក្យសម្ងាត់នៅក្នុងឧបករណ៍របស់អ្នក និងប្រមូលទិន្នន័យសម្ងាត់
- ការវាយប្រហារតាម USB ដែលមិនបានកែប្រែ៖ ប្រភេទនេះមិនបានកែប្រែ USB ទេ ប៉ុន្តែក៏មានផ្នែកខ្លះនៃ partition របស់ USB ត្រូវបានលាក់ ឬបានបង្កើតជាសម្ងាត់នៅពេលតភ្ជាប់។ ផ្នែកលាក់នេះត្រូវបានប្រើដើម្បីចម្លងទិន្នន័យរបស់អ្នក ខណៈពេលដែលអ្នកមិនអាចលុប ឬធ្វើការ format បានទេ
- ការវាយប្រហារដោយអគ្គិសនី (Electrical)៖ វាក៏ត្រូវបានគេឈ្មោះថាជាឃាតករ USB ផងដែរ។ នៅពេលដែល USB ដែលឆ្លងមេរោគត្រូវបានភ្ជាប់ទៅកុំព្យូទ័ររបស់អ្នក វានឹងធ្វើអោយខូចទៅដល់បន្ទះសៀគ្វី USB ហើយធ្វើការចម្លងអគ្គិសនីនិងបណ្តាលឱ្យខូចកុំព្យូទ័ររបស់អ្នក
- ការវាយប្រហារទម្លាក់ USB៖ ចោរព័ត៌មានវិទ្យា ឬហេកគ័រ នឹងទុក USB ដែលឆ្លងមេរោគនៅកន្លែងសាធារណៈ ដោយរង់ចាំនរណាម្នាក់រើសយក។ ប្រសិនបើ USB ត្រូវបានភ្ជាប់ជាមួយកុំព្យូរទ័រវានឹងចាប់ផ្តើមដំឡើងកម្មវិធីព្យាបាទនៅលើឧបករណ៍របស់អ្នក ឬផ្តល់សិទ្ធិចូលប្រើពីចម្ងាយដល់ចោរព័ត៌មានវិទ្យា ឬហេកគ័រ។
៤.វិធីការពារការវាយប្រហារតាម USB
ការវាយប្រហារតាមរយៈ USB អាចកើតឡើងក្នុងស្ថានភាពផ្សេងៗ ប៉ុន្តែពិតជាមានវិធីការពារបាន! ខាងក្រោមនេះគឺជាគន្លឹះមួយចំនួនដែលអ្នកគួរយកចិត្តទុកដាក់។
- ប្រើ USB ដែលអាចទុកចិត្តបានតែប៉ុណ្ណោះ៖ វិធីសាស្ត្រដ៏ល្អបំផុតដើម្បីជៀសវាងការវាយប្រហារដោយទម្លាក់ USB គឺប្រើតែ USB drives ដែលអ្នកទុកចិត្តប៉ុណ្ណោះ។ កុំភ្ជាប់ USB ដែលសង្ស័យទៅកុំព្យូទ័ររបស់អ្នក
- ដំណើរការកម្មវិធីកំចាត់មេរោគដែលមានអាជ្ញាប័ណ្ណ៖ ការដំណើរការកម្មវិធីកំចាត់មេរោគមានអាជ្ញាប័ណ្ណនៅលើកុំព្យូទ័ររបស់អ្នកនឹងអាចរកឃើញមេរោគភាគច្រើន។ អ្នកក៏ត្រូវធ្វើការស្កេនកំចាត់មេរោគជាទៀងទាត់នៅពេលប្រើ USB របស់អ្នក
- ធ្វើកូដនីយកម្មទិន្នន័យសំខាន់ៗ និងផ្ទាល់ខ្លួន៖ ឯកសារដែលបានធ្វើកូដនីយកម្មទាមទារ ពាក្យសម្ងាត់ មុនពេលចូលប្រើពួកវា។ ប្រសិនបើនរណាម្នាក់ព្យាយាមលួចទិន្នន័យនៅលើកុំព្យូទ័រឬឧបករណ៍របស់អ្នក គេមិនអាចអាននិងប្រើប្រាស់វាបានដោយមិនដឹងពាក្យសម្ងាត់ទេ
- ធ្វើការបែងចែក USB ផ្ទាល់ខ្លួន និងការងារ៖ វាចាំបាច់ណាស់ដើម្បីបំបែក USB សាធារណៈ និងឯកជនដាច់ពីគ្នា។ ដោយសារអ្នកអាចតភ្ជាប់ USB សាធារណៈ ដែលទាក់ទងនឹងការងារទៅកាន់ឧបករណ៍សាធារណៈជាច្រើន អ្នកមិនគួររក្សាទុកព័ត៌មានផ្ទាល់ខ្លួននៅលើវាទេ ដើម្បីការពារទិន្នន័យរបស់អ្នក។
៥.ឯកសារពាក់ព័ន្ធ
- https://www.minitool.com/news/usb-attack-preventions.html
