សិង្ហបុរី៖ នាថ្ងៃទី១៩ ខែតុលា ឆ្នាំ២០២២ លោក ចាន់ ភក្ត្រា អនុប្រធានការិយាល័យ នៃនាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាន នៃក្រសួងប្រៃសណីយ៍និងទូរគមនាគមន៍ (MPTC) បានដឹកនាំនិស្សិតចំនួនពីររូបទៅចូលរួម ព្រឹត្តិការណ៍ប្រកួតប្រជែងផ្នែកសន្តិសុខបច្ចេកវិទ្យាគមនាគមន៍និងព័ត៌មានលើកទី ១២ (12th Cyber Conquest) នៅទីក្រុងសិង្ហបុរី ស្របពេលជាមួយនឹង ព្រឹត្តិការណ៍ Singapore International Cyber Week 2022។
នេះគឺជាលើកទី៣ ហើយដែលភាគីសឹង្ហបុរីបើកឲ្យមានការចូលរួមពីសំណាក់និស្សិតមកពីប្រទេសក្នុងតំបន់អាស៊ាន (១០ប្រទេស) ប្រកួតប្រជែងជាមួយនឹងនិស្សិតមកពីគ្រឹះស្ថានបណ្តុះបណ្តាលនានារបស់សឹង្ហបុរី។ នៅក្នុងឆ្នាំ២០២២នេះ មានក្រុមទាំងអស់ចំនួន ៣០ ធ្វើការប្រកួតប្រជែងគ្នាជាលក្ខណៈ Capture The Flag (CTF) ទៅលើប្រធានបទវាយប្រហារ និងការពារ (Red and Blue Team Type) ដោយបេក្ខជនត្រូវពឹងផ្អែកទៅលើចំណេះដឹងដើម្បីស្វែងរកចំនុចខ្សោយនៃប្រព័ន្ធ ហើយនិងត្រួតពិនិត្យ ជួសជុលចំនុចខ្សោយនៃប្រព័ន្ធតាមរយៈសេណារីយោនៃការវាយប្រហារផ្សេងៗ ដែលកំពុងតែកើតមាននាពេលបច្ចុប្បន្ននេះ ដើម្បីឱ្យបេក្ខជនយល់ដឹងអំពីការការពារឱ្យបានទាន់ពេលវេលាទៅលើការវាយប្រហារជាក់ស្តែង។ ការប្រកួតនេះផងដែរក្រុមនីមួយៗមានសមាជិកចំនួនពីររូប ហើយម្នាក់ដើរតួជា Red Team ត្រូវមានសមត្ថភាពក្នុងការស្វែងរកចំនុចខ្សោយរបស់ប្រព័ន្ធ/បណ្តាញ (System/Network) ។ល។ រីឯម្នាក់ទៀតដើរតួជា Blue Team ត្រូវមានសមត្ថភាពក្នុងការត្រួតពិនិត្យចរាចរណ៍ទិន្នន័យបណ្តាញ វិភាគទៅលើ log file, ហើយនិងបញ្ជូលវិធីការពារនៅលើជញ្ជាំងភ្លើង (firewall), SIEM (Security Information and Event Management) ។ល។
គួរបញ្ជាក់ថា និស្សិតពីររូបដែលបានទៅចូលរួមព្រឹត្តិការណ៍ប្រកួតប្រជែងខាងលើនេះ គឺធ្លាប់ចូលរួម ក្នុងព្រឹត្តិការណ៍ Cambodia CTF Challenge 2022 ក្នុងស្រុក ដែលរៀបចំឡើងដោយ Sala Cyber និងក្រុមហ៊ុន Technovage ក្រោមការគាំទ្រដោយក្រសួងប្រៃសណីយ៍និងទូរគមនាគមន៍ និងបណ្ឌិត្យសភាបច្ចេកវិទ្យាឌីជីថលកម្ពុជា កាលពីខែកក្កដា ឆ្នាំ២០២២ កន្លងទៅនេះ។
***Disclaimer: CamCERT own some of the content. Our purpose is pure to help spread the awareness, tips or other information related to security to everyone. Even though every information is true, accurate, completed and appropriate, we make no responsibility nor warranty since everything could go wrong.
