សិង្ហបុរី៖ នាថ្ងៃទី០១ ខែតុលា ឆ្នាំ២០១៩ លោក គឹម អាន អនុប្រធាននាយកដ្ឋាន នៃនាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មាននៃក្រសួងប្រៃសណីយ៍ និងទូរគមនាគមន៍ (MPTC) បានដឹកនាំនិស្សិតចំនួនពីររូបចូលរួមទៅចូលរួម ព្រឹត្តិការណ៍ប្រកួតប្រជែងផ្នែកសន្តិសុខបច្ចេកវិទ្យាគមនាគមន៍ និងព័ត៌មានលើកទី ១០ (10th Cyber Conquest) នៅទីក្រុងសិង្ហបុរី ស្របពេលជាមួយនឹង
ព្រឹត្តិការណ៍ Singapore International Cyber Week 2019។
នេះគឺជាលើកទី២ ហើយដែលភាគីសឹង្ហបុរីបើកឲ្យមានការចូលរួមពីសំណាក់និស្សិតមកពីប្រទេសក្នុងតំបន់អាស៊ាន (១០ប្រទេស) ប្រកួតប្រជែងជាមួយនឹងនិស្សិតមកពីគ្រឹះស្ថានបណ្តុះបណ្តាលនានារបស់សឹង្ហបុរី។ នៅក្នុងឆ្នាំ២០១៩នេះ មានក្រុមទាំងអស់ចំនួន ៣៧ ធ្វើការប្រកួតប្រជែងគ្នាជាលក្ខណៈ Capture The Flag (CTF) ទៅលើប្រធានបទវាយប្រហារ និងការពារ (Red and Blue Team Type) ដោយបេក្ខជនត្រូវពឹងផ្អែកទៅលើចំណេះដឹងដើម្បីស្វែងរកចំនុចខ្សោយនៃប្រព័ន្ធ ហើយនិងត្រួតពិនិត្យ ជួសជុលចំនុចខ្សោយនៃប្រព័ន្ធតាមរយៈសេណារីយោនៃការវាយប្រហារផ្សេងៗ ដែលកំពុងតែកើតមាននាពេលបច្ចុប្បន្ននេះ ដើម្បីឱ្យបេក្ខជនយល់ដឹងអំពីការការពារឱ្យបានទាន់ពេលវេលាទៅលើការវាយប្រហារជាក់ស្តែង។ ការប្រកួតនេះផងដែរក្រុមនីមួយៗមានសមាជិកចំនួនពីររូប ហើយម្នាក់ដើរតួជា Red Team ត្រូវមានសមត្ថភាពក្នុងការស្វែងរកចំនុចខ្សោយរបស់ប្រព័ន្ធ/បណ្តាញ (System/Network) ។ល។ រីឯម្នាក់ទៀតដើរតួជា ; Blue Team ត្រូវមានសមត្ថភាពក្នុងការត្រួតពិនិត្យចរាចរណ៍ទិន្នន័យបណ្តាញ វិភាគទៅលើ log file, ហើយនិងបញ្ជូលវិធីការពារនៅលើជញ្ជាំងភ្លើង (firewall), SIEM (Security Information and Event Management) ។ល។
គួរបញ្ជាក់ថា និស្សិតពីររូបដែលបានទៅចូលរួមព្រឹត្តិការណ៍ប្រកួតប្រជែងខាងលើនេះ គឺទទួលបានជាប់ជ័យលាភីក្នុងស្រុក ក្នុងព្រឹត្តិការណ៍ Cambodia Cyber Contest 2019 ដែលរៀបចំឡើងដោយក្រសួងប្រៃសណីយ៍ និងទូរគមនាគមន៍កាលពីខែសីហា ឆ្នាំ២០១៩ កន្លងទៅនេះ។
***Disclaimer: CamCERT own some of the content. Our purpose is pure to help spread the awareness, tips or other information related to security to everyone. Even though every information is true, accurate, completed and appropriate, we make no responsibility nor warranty since everything could go wrong.
