ថៃ៖ នាថ្ងៃទី១១ ខែវិច្ឆិកា ឆ្នាំ២០២២ លោក វឿនរ័ត្ន សុថាណាវឌ្ឍន៍ អនុប្រធានការិយាល័យ នៃនាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាននិងលោក អ៊ុក វិសាល មន្ត្រី នៃនាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាន នៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មាននៃក្រសួងប្រៃសណីយ៍និងទូរគមនាគមន៍ (MPTC) បានដឹកនាំនិស្សិតចំនួនពីររូប ទៅចូលរួមព្រឹត្តិការណ៍ប្រកួតប្រជែងផ្នែកសន្តិសុខបច្ចេកវិទ្យាគមនាគមន៍និងព័ត៌មានថ្នាក់តំបន់ ASEAN Cyber SEA Game 2022 នៅទីក្រុងបាងកក ព្រះរាជាណាចក្រថៃ។
នេះគឺជាលើកទី៧ ហើយដែលព្រឹត្តិការណ៍ប្រកួតប្រជែងនេះត្រូវបានរៀបចំឡើងដោយភ្នាក់ងារអភិវឌ្ឍន៍ប្រតិបត្តិការអេឡិកត្រូនិកថៃ (Electronic Transactions Development Agency -ETDA) សហការជាមួយនឹងមជ្ឈមណ្ឌលអាស៊ាន-ជប៉ុនសម្រាប់កសាងសមត្ថភាពសន្តិសុខបច្ចេកវិទ្យាគមនាគមន៍ និងព័ត៌មាន (ASEAN-Japan Cybersecurity Capacity Building Center – AJCCBC)។ គោលបំណងនៃការប្រកួតនេះគឺដើម្បីវាស់ស្ទង់សមត្ថភាពមន្ត្រី និងនិស្សិត រឹតចំណងមិត្តភាព ជម្រុញការអភិវឌ្ឍ និងកិច្ចសហប្រតិបត្តិការរវាងអាស៊ាន និងជប៉ុន។
ការប្រកួតនេះមានទម្រង់ជា Capture The Flag (CTF) ហើយបានប្រព្រឹត្តិទៅនៅលើវិញ្ញាសារមួយចំនួនដូចជា Web Security, Cryptography, Forensics, OS, MISC, Binary, Network និងផ្សេងៗបន្ថែមទៀត។
ការប្រកួតប្រព្រឹត្តិទៅរយៈពេល ០៧ម៉ោង ក្រុមដែលទទួលបានចំណាត់ថ្នាក់លេខ១ មកពីប្រទេសវៀតណាម ចំណាត់ថ្នាក់លេខ២ មកពីប្រទេសសឹង្ហបុរីចំណាត់ថ្នាក់លេខ៣ មកពីប្រទេសថៃ ហើយក្នុងឆ្នាំនេះផងដែលក្រុមកម្ពុជាទទួលបានចំណាត់ថ្នាក់ទី ៩ ការប្រកួតនេះមានអ្នកចូលរួមចំនួន ១០ក្រុម៕
