រាជធានីភ្នំពេញ៖នាថ្ងៃទី២៥ ខែតុលា ឆ្នាំ២០២៣ នៅបណ្ឌិត្យសភាបច្ចេកវិទ្យាឌីជីថលកម្ពុជា បានរៀបចំសិក្ខាសាលាប្រចាំសប្តាហ៍ស្តីពី “សន្តិសុខសាយប័រ” ដោយមានការចូលរួមពីនិស្សិតប្រមាណ ១៣០នាក់ ។ សិក្ខាសាលានេះមានគោលបំណងលើកកម្ពស់ការយល់ដឹងដល់និស្សិតពាក់ព័ន្ធនឹងប្រធានបទដូចខាងក្រោម៖
- ទិដ្ឋភាពការគំរាមកំហែងសន្តិសុខសាយប័រនៅកម្ពុជា
- អាជីពសន្តិសុខសាយប័រ
- វិធីសាស្ត្ររបស់ហេកគ័រ (HACKER) ក្នុងការលួចចូល និងចម្លងមេរោគ
លោក អ៊ូ ផាន់ណារិទ្ធ ប្រធាននាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាន នៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មាន នៃក្រសួងប្រៃសណីយ៍និងទូរគមនាគមន៍ បានធ្វើបទបង្ហាញអំពីទិដ្ឋភាពការគំរាមកំហែងសន្តិសុខសាយប័រនៅកម្ពុជា ដែលរួមមានមូលដ្ឋានគ្រឹះនៃសន្តិសុខសាយប័រ សារៈសំខាន់នៃការការពារទិន្នន័យ/ព័ត៌មាន បញ្ហាប្រឈម ការបោកបញ្ឆោត បទល្មើសបច្ចេកវិទ្យា ដែលតែងតែកើតឡើងនៅកម្ពុជា និងវិធានការការពារប្រកបដោយសុវត្ថិភាព ដើម្បីកាត់បន្ថយហានិភ័យដែលកើតមានឡើងពីការប្រើប្រាស់បចេ្ចកវិទ្យាព័ត៌មាន។
លោក គឹម អាន អនុប្រធាននាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាន នៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មាន នៃក្រសួងប្រៃសណីយ៍និងទូរគមនាគមន៍ បានធ្វើបទបង្ហាញអំពីអាជីពសន្តិសុខសាយប័រ ដែលផ្តោតលើតួនាទី ភារៈកិច្ច និងចំណេះដឹងចាំបាច់ដើម្បីអាចឈានទៅចាប់យកអាជីពនីមួយៗ និងបានចែករំលែកអំពីបទពិសោធន៍ ប្រភពសិក្សា និងឱ្យកាស និងការប្រកួតប្រជែងដែលមាននៅក្នុងវិស័យសន្តិសុខសាយប័រនៅកម្ពុជា។
លោក សុខ សុវណ្ណ ប្រធានការិយាល័យ នៃនាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាន នៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មាន នៃក្រសួងប្រៃសណីយ៍និងទូរគមនាគមន៍ បានបង្ហាញអំពីវិធីសាស្ត្ររបស់ហេកគ័រ ក្នុងការលួចចូលទៅក្នុងកុំព្យូទ័ររបស់ជនរងគ្រោះ និងធ្វើសកម្មភាពលួចចម្លងទិន្នន័យ ស្តាប់សំលេង ថតរូប វីដេអូ តាមដានសកម្មភាពក្នុងការប្រើប្រាស់កុំព្យូទ័ររបស់ជនរងគ្រោះ និងចម្លងមេរោគចាប់ជំរិត។
